மதுரை: மதுரை அரசு மருத்துவமனை மற்றும் அதன் கீழ் உள்ள ஆரம்ப சுகாதார நிலையங்களுக்கு தினசரி குறைந்தது 100 யூனிட் ரத்தம் தேவைப்படுகிறது. தற்போது கல்லூரிகளில் தேர்வுகள் மற்றும் விடுமுறைகள் நடைபெறுவதால், ரத்ததானம் குறைந்து பற்றாக்குறை ஏற்படும் வாய்ப்பு உள்ளது.

கடந்த ஆண்டு அரசு மற்றும் தனியார் நிறுவனங்கள், தொண்டு நிறுவனங்கள், கல்லூரிகள், குடியிருப்போர் நலச்சங்கங்கள் இணைந்து நடத்திய ரத்ததான முகாம்களின் மூலம் மொத்தம் 30 ஆயிரம் யூனிட் ரத்தம் சேகரிக்கப்பட்டது. இதில் 35 சதவீதம் தனிநபர்களிடமிருந்து பெறப்பட்டவை. இவ்வாறு சேகரிக்கப்பட்ட ரத்தத்திலிருந்து சிவப்பணு, தட்டணுக்கள், பிளாஸ்மா ஆகியவை பிரிக்கப்பட்டு 72 ஆயிரம் யூனிட்களாக மருத்துவ தேவைகளுக்காக வழங்கப்பட்டன.